أخر تحديث:
السبت 20 أكتوبر-تشرين الأول 2018 11:05 مساءً
بقلم/عبدان دهيس
طباعة المقال طباعة المقال
RSS Feed نافذة الحدث
RSS Feed بقلم/عبدان دهيس
RSS Feed
بحث

  
جنوبيون في صنعاء شماليون في عدن ..!ِ
بقلم/ بقلم/عبدان دهيس
نشر منذ: 7 أشهر و 18 يوماً
السبت 03 مارس - آذار 2018 05:50 م


 

((جنوبيون في صنعاء.. شماليون في عدن)).. الله يرحمك يا شاعرنا الكبير عبدالله البردوني.. والله أنك قد تنبأت من زمان.. إنه بيجي يوم..(( صحاب الجنوب)) ينزحوا لا صنعاء.. و((صحاب الشمال)) ينزحوا لا عدن – بس ((الشماليين)) يا بردوني اللي في عدن هذي الأيام.. أزيد من ((الجنوبيين)) اللي في صنعاء .. ((وأنتي أرحبي يا جنازه فوق لموات)).. اليوم عدن تقول واضيقي من ((الاوادم)).. بشر كما الذر القادمين من المحفظات الشماليه.. دبيش الدبيش..(لاوين أنا لاوين).. قالوا انهم فارين من ((الحوثيين)).. ونحنا شوه لأمهاتنا وأمهات أمهاتنا في هذا الباب بكله.. ولا لنا دخل في السياسه .. خلوا لنا حالنا قدنا في (التنك) .. وكم بتكون هذي عدن .. وكم بتوسع .. بس من واجبنا نقول .. يا أهلا وسهلا بخوتنا الشماليين.. وعلى العين والراس..((عدن ترحب بكم)).. أدخلوها بسلام آمنين – ((من دخل بيت أبي سفيان كان آمنا))- البلاد بلادكم.. والأرض أرضكم .. وأنتوا خوتنا دم ولحم .. عيب الله المستعان نتخلى عنكم في وقت المحنه والشده.. وقد جزعت علينا مثل هذي الظروف وفرينا لا عندكم.. نحنا نعرف الأصول.. بيوتنا بيوتكم.. وكمارنا((حقت البيس)) كماركم.. وكياس شمزانا مفتوحه لكم.. وأكلنا أكلكم .. وماينا مايكم.. يالوماه نحنا أهل وعيال خاله.. وعيال عمه وعيال جده وصهور.. وحبايب من زمان الزامنين.. عدن مع الجنوب .. في سنه((تسعين)) وفي سنه((أربعة وتسعين)) كله حقكم.. بترابه وجباله وبحاره.. الله يعطيكم .. والله يهنيكم .. أفعلوا اللي تبوا تفعلوه .. لكم كل الحريه.. صلحوا أكشاك.. صلحوا مخابيز ومطاعم وهتيلات ومشارب وأفتحوا بقالات .. بيعوا ((هند )) أو ((بطيطا))) وإلا بقل وكرات – وقده هذا شغلكم الفالحين فيه.. أٍستكروا (((الزوالي)) حقت البلديه- على ما تقولوا – الحمامات العامه.. ونحنا بنبول فيها ببيس.. البول بولنا والزولي حقنا .. والبيس لكم.. يا نعمة الله دومي.. ويا الله خراجك من الدحابشه.. ماعليش الأجر عند الله.. لازم نساعدهم بكيف ماامكن حتى بحق البول.. هذا واجب علينا.. والحوافي حقتنا مفتوحه لكم .. حوسوا ودوروا فيها بالجواري على راحتكم وهذا من حقكم ونحنا بنشتري من عندكم.. ونبشركم إنه حصلنا (ورقه قديمه) من زمان((الطليان)) مكتوب فيها بالرقعه تقول.. ((أن عدن والجنوب كله حق الدحابشه الشماليين من قفا نقيل يسلح)).. الفارين من ((الأمام)) وما بعد ((الأمام))- يعني ((أيام الجمهوريه)) والى الأن – اما نحنا ((أهل عدن)) وأهل الجنوب.. اعتبرونا((مغتربين وأجانب)) مقيمين عندكم وجلوس بإقامه وفيزه عمل في هذي البلاد.. وبلادنا الأصليه((جزرالدجاج))- وهذي البلاد((جزر الدجاج)) تقع قفا((جزر البقر)) – يعني يامعنى بعيد قليل عن ((جزر الغنم)) – بس جدنا اللي بلا أسم .. الله يرحمه .. هاجر قبل ألوف ألوف ألوف السنين والمنين الى عدن طلبا للرزق والعيشه .. وكان راعي غنم .. وتزوج هنا من ((أبوالوادي)) وجاب عويله وبنات.. وتكاثروا وتوالدوا وقعوا ملات عدن – الله يبارك- وانتشروا كما الجراد في الجنوب كله ..! ذلحين أنتوا يا ((دحابشه)) يا شماليين.. يا خوتنا من الرضاعه .. تعتبروا ((الأصل)) ونحنا ((الفرع)) وهذا آخر كلام.. وسامحونا لما شلينا عليكم بلادكم .. طيب شوه عادكم تبوا من كلام ثاني .. لكم حريتكم وراحتكم (تارق) ونص (الحرس الجمهوري) نزلوا عدن .. و(حمد علي) قدكم تعرفوه.. والان هنوك حمله سموها ..(شعبيه مؤتمريه) تطالب برفع العقوبات الدوليه عليه .. وكل شي تمام التمام.. ولاعاد ينقصكم حاجه- حتى لو كان مجلس الامن الدولي رفض رفع العقوبات عليه – الله يخلي التحالف .. والدنيا بخير .. والوحده مكانيه (باجيه) – أصل خوتنا الدحابشه الشماليين ينطقوا القاف(جيم) يبوا يقولوا ..(الوحده باقيه) – ماعليش (باجيه) والا (سمبوسه) .. كله يسبر.. أصل (شهر رمضان) قده على لبواب.. والباجيه والسمبوسه تكثر فيه..!

أنا عمري الان – ما شاء الله – (سبعين سنه) بالوفاء والتمام.. على ماتقولوا ..(سنه تنطح سنه) .. والله العظيم .. وماعندي لكم يمين ياجماعة الخير .. تصدقوا إني الى حدك والان .. ولا داري شوه اللي يجري في هذي البلاد .. (الجنوب والشمال) سوى بسوى .. يا أنه (حرب) من صدق .. يا أنه (لعب عويله) .. يا (قراح طماش وزماميط) .. يا انه (صفطه) .. الشماليين نزلوا لاعدن.. والبوابير طالعين نازلين .. لا عندهم ولا عندنا .. والخضره والقات الشمالي ملات (السوق الجنوبي) .. كل يوم بيومه .. والليم الحالي(أبو سره) من حق صعده- بلاد الحوثيين . زايد (التفاح الايراني) .. يباع ويشترى في عدن وكل بلاد الجنوب .. والبيس تهب لاجيوب الحوثيين.. وكيف هذي الحرب..؟ وشوه هوه الخبر من اساسه..؟ كيه قلو لنا.. ؟ ثلاث سنين ونحنا على هذا الحال والترحوال .. الناس تعبت يا امم متحده ومجلس أمن .. يااما تقع حرب من صدق وتحسم الامور ياكذا او كذا .. يا اما افعلوا لنا حل ثاني – والدنيا ملانه حلول_ قبل ماتفلت (المسبحه)) من يدات الجميع.. عند الله وعندكم.. افعلوا حل لهذا الشعب التعبان النكدان اللي طول حياة امه وهوه في شكع.. واحد كما ((شيطان الرجيم)) شافني وانا اكتب هذا المقال .. قال: يالحجي خليك البلاطه .. من صبح الله وانته تشقى الدحابشه .. قلت انك تحبهم .. شوه من حب هذا بالله عليك.. ؟ قلت له : ماقد قال قبلنا شاعرنا الكبير البردوني .. ((جنوبيون في صنعاء .. شماليون في عدن)).. ويا الله بالخير .. تبان مدبوشه..!

عودة إلى نافذة الحدث
نافذة الحدث
حمزه الضريبي
انا وطن لكم
حمزه الضريبي
دكتور/عبدالناصر الهزمي
من انت ؟
دكتور/عبدالناصر الهزمي
دكتور/عبدالناصر الهزمي
قصة : مهندس يبحث عن الهندسة
دكتور/عبدالناصر الهزمي
ورده العواضي
ثورة فبراير.. هل خدمت الاضلاحيين ام الحوثيين؟
ورده العواضي
دكتور/عبدالناصر الهزمي
كن لنفسك كل شيئ
دكتور/عبدالناصر الهزمي
مفيد الحالمي
شكراً سلمان .. مزيداً من هذه الصواريخ!
مفيد الحالمي
الـمـزيـد